Një trajner italian pritet të zëvendësojë Panuccin

Ervin Bulku dhe Sulejman Mema do të drejtojnë kuqezinjtë për ndeshjen ndaj Andorrës

Christian Panucci edhe zyrtarisht është larguar nga Kombëtarja shqiptare pas humbjes 0:2 nga Turqia. Humbja e fundit ishte fatale për të, pasi është shkarkuar nga Federata Shqiptare të Futbollit.

Kuqezinjtë të hënën përballen me Andorrën, derisa do të drejtohen nga Ervin Bulku dhe Sulejman Mema, përcjell albinfo.ch.

Më pas Federata do të ketë kohën e duhur në dispozicion, për të gjetur njeriun që do t’i besohet Kombëtarja, për edicionin eliminator të Euro 2020-ës, i cili nuk nisi në mënyrën e duhur, raportojnë mediat shqiptare.

Emri i Edy Rejës është i pari në listën e kreut të FSHF-së, Armand Duka, ndërsa 73-vjeçari italian ishte në “Loro Boriçi” për të ndjekur nga afër takimin mes Shqipërisë dhe Turqisë.

Sidoqoftë, trajneri italian nuk e ka komentuar nëse do të drejtojë kuqezinjtë.

Reja ka një karrierë mjaft të pasur si trajner, pasi ka drejtuar skuadra si Napoli, Atalanta dhe Lazio.

---