Skip to content

Kosova ndalet në Ligën B, pas suksesit në kualifikimet për Botërorin 2026

Pasi iu afrua Botërorit, Kosova “stagnon” në Ligën e Kombeve

Pas paraqitjes së shkëlqyer në kualifikimet për Botërorin, ku iu afrua historisë, Kosova nuk arriti ta vazhdojë të njëjtin ritëm në Ligën e Kombeve. “Dardanët” e përfunduan grupin në vendin e tretë, duke siguruar qëndrimin në Ligën B, por pa arritur objektivat më të larta.

Fushata kualifikuese për Botërorin 2026 mbetet deri më tani më e suksesshmja e Kosovës. Në një grup ku fillimisht shihej si autsajdere, përfaqësuesja kosovare përfundoi e dyta, pas Zvicrës dhe përpara Sllovenisë e Suedisë. Në plejof eliminoi Sllovakinë, por humbi 1:0 nga Turqia në ndeshjen vendimtare për kualifikim në Botëror.

Ky sukses rriti ndjeshëm entuziazmin për përfaqësuesen e futbollit, ndërsa pritjet ishin që “Dardanët” ta vazhdonin ngritjen edhe në edicionin e pestë të Ligës së Kombeve të UEFA-s. Për herë të parë, Kosova garoi në Ligën B, nivelin e dytë të këtij kompeticioni.

Fillimi ishte premtues. Më 24 shtator, Kosova fitoi 1:0 ndaj Irlandës në Prishtinë. Por kjo mbeti fitorja e vetme në këtë fushatë, e cila përfundoi të martën mbrëma me humbjen e rëndë 3:0 nga Irlanda në Dublin, para rreth 50 mijë shikuesve.

Më herët, më 27 shtator, Kosova ishte mposhtur 3:1 nga Austria në Vjenë. Më pas pasuan barazimi pa gola me Izraelin dhe ai 1:1 ndaj Austrisë në Prishtinë.

Para ndeshjes së fundit, Kosova kishte ende mundësi të mira për ta përfunduar grupin në vendin e dytë. Një barazim në Dublin do t’i siguronte këtë pozitë, e cila do t’i sillte mundësinë për të luajtur në plejof për ngjitje në Ligën A, si dhe një vend në vazon e dytë për shortin e kualifikimeve për Euro 2028.

Në një moment, situata u bë edhe më e ndërlikuar, pasi Izraeli po fitonte 1:0 ndaj Austrisë dhe Kosova rrezikonte të përfundonte e fundit në grup. Megjithatë, Austria arriti të barazojë 1:1, duke bërë që Kosova ta mbyllte garën në vendin e tretë, me gjashtë pikë. Kjo pozitë ia siguroi qëndrimin në Ligën B.

Për një pjesë të tifozëve, mbetja në këtë nivel përbën sukses, ndërsa edhe përzgjedhësi Franco Foda kishte përsëritur disa herë se objektivi ishte pikërisht qëndrimi në Ligën B.

Megjithatë, një pjesë e madhe e tifozëve nuk e shohin këtë rezultat si përparim. Pas suksesit në kualifikimet për Botërorin, vendi i tretë në grup po vlerësohet më shumë si stagnim sesa si vazhdim i rritjes së përfaqësueses.

Pas ndeshjes me Irlandën, Foda theksoi se Liga B paraqet një nivel dukshëm më të lartë se Liga C, ndërsa pranoi se Kosovës i munguan golat në ndeshjet vendimtare në shtëpi.

“Ishte hera e parë që luajtëm në Ligën B. Filluam mirë. Ndaj Irlandës fituam në shtëpi. Ndaj Austrisë dhe Izraelit ndoshta është dashur t’i merrnim pikët e plota në shtëpi. Skuadra mori mësim nga këto ndeshje. E pamë që Liga B është nivel tjetër nga Liga C. Ajo që na mungoi ishin golat në ndeshjet në shtëpi ndaj Austrisë dhe Izraelit, të cilat është dashur t’i fitonim”, deklaroi Foda./Albinfo.ch