Ish-refugjati nga Kosova ndërton shkollë, kopsht e ambulancë në Bardhec të Kukësit

Ish-gazetari i luftës, Rexhep Shahu, ka njoftuar se Arafat Abazaj ka ndërtuar një shkollë, një kopsht dhe një ambulancë në fshatin Bardhoc të Kukësit.

Ai përmes një postimi në Facebook, ka njoftuar se Arafat Abazaj ishte refugjat nga Kosova, i cili pas 20 vjetëve pas luftës ka blerë tokën dhe e ka ndërtuar dhe kompletuar shkollën fillore e kopshtin e ri në Bardhoc.

Shehu ka treguar se e vetmja kërkesë e Abazajt ishte që shkolla të ketë emrin 27 Mars, dita kur u dëbua nga serbët.

“Dhuratë mirënjohëse, një shkollë, një kopësht, një ambulancë. Sot, më 27 mars 2019, në 20-vjetorin e fillimit të eksodit masiv të shqiptarëve të Kosovës drejt Kukësit, më 27 mars 1999, një djalë nga Poslishti i Prizrenit, Arafat Abazaj, pronar i Kompanisë ndërtuese Abazaj që atëherë ishte 18 vjeç e sot 38, i bën dhuratë mirënjohje për mikpritjen fshatit tim të lindjes Bardhoc të Kukësit. Dhuratë jo të zakonshme, por një shkollë me kopsht e ambulancë.

“Arafat Abazaj bëri atë që nuk e ka bërë asnjë biznesmen kuksian për asnjë fshat të Kukësit“, ka shkruar Shahu, përcjell albinfo.ch.

Sipas Shahut, ky është gjesti i parë kaq fisnik e madhështor, gjest që nuk bëjnë shtetet tona, por e bëri një ish i dëbuar nga dhuna serb.

“Arafat Abazaj si shumë shqiptarë të rajonit të Prizrenit kishte ardhur me gjithë familjen e tij në këtë festë të tijën e të tonën. Dhuruesi pati vetëm një kërkesë, kjo shkollë të thirret: Shkolla 27 marsi, në kujtim të asaj që nuk duhet harruar kurrë“.