Basha: Rama i ka ditët e numëruara

Keystone EPA/MALTON DIBRA

Kryetari i Partisë Demokratike, Lulzim Basha, iu drejtua protestuesve me një fjalë përpara Kuvendit të Shqipërisë, aty ku edhe po mbahej protesta, ndërkohë që brenda në Parlament po mbahej seanca plenare.

Kreu i PD-së tha se kryeministri Edi Rama është shndërruar në simbol të krizës, mungesës së shpresës dhe ekonomisë së shkatërruar.

“Edi Rama rriti taksat, energjinë, çoji në burg drejt vetëvrasjeve dhjetëra familjarë që nuk paguanin faturat e kripura, rriti çmimin e ujit, të naftës dhe shkatërroi dhjetëra mijëra biznese duke lënë njerëzit në mes të rrugës pa punë”, deklaroi Basha.

Ai gjithashtu tha se Rama është munduar të mashtrojë shqiptarët me propagandë së bashku me kryetarin e Bashkisë së Tiranës, Erion Veliaj, në mitingun e Partisë Socialiste të së shtunës së kaluar, shkruan Telegrafi, përcjell albinfo.ch.

Basha tha se në sheshin e protestës janë bashkuar hallet e shqiptarëve, por ata janë shpresa e vetme për zgjidhjen e tyre.

“E di që gjithsecili prej jush ka ardhur me vendosmërinë e pathyeshme për t’i dhënë fund regjimit mafioz të Edi Ramës dhe për ta përcjellë Maduron e Ballkanit drejt drejtësisë ose në azil politik, por edhe për t’i dhënë sinjal të qartë shprese çdo shqiptari kudo ku ndodhet. Si çdo protestë tjetër, edhe sot këtu janë bashkuar hallet e panumërta të shqiptarëve, por edhe zgjidhjet ,edhe shpresa për atë që po vjen”, vijoi kreu i PD-së.

Basha tha se Edi Rama i ka orët e numëruara dhe ndryshimet që ai paralajmëroi, tha se janë për një shtet që do t’i takojë dhe shërbejë vetëm qytetarëve, shkruan Telegrafi, përcjell albinfo.ch.