KFOR-i: Me gjithë spekulimet, gjendja është nën kontroll në veri

Zyra për Informim e Shtabit të KFOR-it përmes një komunikate për media ka konfirmuar se gjendja në veri, si dhe në mbarë Kosovën, është absolutisht nën kontroll dhe nuk ka asnjë shenjë apo dëshmi për trazira apo dhunë të mundshme.

“Pavarësisht nga thirrjet e shumta për mospërhapje të spekulimeve të papërgjegjshme, për fat të keq thashethemet e fabrikuara vazhdojnë të qarkullojnë nëpër media dhe shkaktojnë shqetësime të pabaza te popullata. KFOR-i konfirmon se gjendja në veri, si dhe në mbarë Kosovën, është absolutisht nën kontroll dhe nuk ka asnjë shenjë apo dëshmi për trazira apo dhunë të mundshme”, thuhet në deklaratë.

Sipas KFOR-it, nuk ka asnjë arsye për shqetësim dhe frikë. Ata kanë sqaruar se këtyre ditëve një grup i oficerëve të NATO-s, të shoqëruar nga KFOR-i, po zhvillon një aktivitet zbulimi nëpër Kosovë.

Ata oficerë janë nga shtetet e ndryshme të NATO-s, përfshirë Shqipërinë. Në deklaratë thuhet se aktiviteti përfshin vizita nëpër vende të ndryshme në Kosovë, duke përfshirë Mitrovicën dhe lokacione të tjera në veri.

“Ky nuk është provokim, por është një aktivitet i përbashkët i NATO-s, dhe prania e 4 oficerëve shqiptarë nuk duhet ta habisë askënd, pasi që Shqipëria është anëtare e NATO-s tani e 10 vjet. Për më tepër, duhet të dihet se Shqipëria gjithashtu kontribuon në misionin e KFOR-it”, vijon komunikata, transmeton Ksp, përcjell albinfo.ch.

Sipas tyre, KFOR-i vazhdon në mënyrë të paanshme t’i përkushtohet mandatit të OKB-së për ta mbrojtur tërë popullin në Kosovë, prandaj kur KFOR-i ushtron dhe lëviz nëpër Kosovë, të gjithë duhet të ndihen të sigurt.