Opozita, kundër autostradës së Dukagjinit

Lëvizja Vetëvendosje po e kundërshton projektin e ndërtimit të autostradës së Dukagjinit. Deputeti i kësaj lëvizjeje, Liburn Aliu, në një konferencë për media ka thënë se kjo shumë prej një miliard eurosh do të ishte më mirë që të investohej në zhvillim ekonomik.

“Qytetarët e Rahovecit kanë vazhduar me aktivitete dhe peticion që ka kaluar me 5 mijë nënshkrime. Nuk mund të ndërtosh autostradë afër Drinit dhe t’ua shkatërrosh tokat”, ka deklaruar Aliu.

Sipas tij, qytetarët po ikin jashtë vendit, pasi që Kosova po përballet me ngecje në zhvillimin ekonomik. Për këtë ka reaguar Ministria e Infrastrukturës  duke e arsyetuar variantin final të Autostradës së Dukagjinit.

MI-ja thotë se varianti përgjatë lumit Drini i Bardhë është më i favorshëm ngase përveç kritereve teknike që dalin nga detyra projektuese, ata kanë marrë parasysh edhe: Rregullimin e shtratit të lumit Drini i Bardhë, Parandalimi i degradimit të lumit, shpronësim minimal i tokave bujqësore dhe tokave private që sipas MI-së aksi i autostradës kalon më shumë se 70% mbi sipërfaqe të degraduar të tokave bujqësore rreth lumit.