Kosovari që po “çmend” me talentin e tij aktorët e Hollivudit

Stilisti nga Kosova, Nazim Salihu, që jeton në Hollivud, thotë se ka tri  dekada që merret çdo ditë me flokun dhe trendët e fundit të modës, të cilat përpiqet t’i përcjellë në të njëjtën mënyrë dhe të eksperimentojë për t’i bërë edhe më të veçanta ato. Ai thotë se punon në atë mënyrë që të jetë unik dhe të duken sa më interesante punimet e tij. Kjo duket se i ka sjellë edhe suksesin atij.

Stilisti tregon se ka rregulluar disa nga aktorët e njohur të Hollivudit, si Luck Welson, Jenifer Aniston, këngëtarin Keny Roger, sportistë e shumë aktorë të tjerë. 

Nazimi pohon se me stilimin e flokëve tani më merren edhe vajzat e tij, që janë bërë pjesë e pandarë e skuadrës. Ishte periudhë e vështirë për Kosovën, kur iu hapën dyert e ëndrrës së madhe, përcjell albinfo.ch.

Ai është shembulli i një njeriu që ka realizuar gjithçka me shumë mund. Pasionin dhe profesionin e tij e vlerësojnë në SHBA e kudo ku duart e tij kanë prekur të bukurën. Nazim Salihu jeton në Amerikë që nga viti 1999, ndërsa tregon se dëshira për t’u bërë stilist e kishte ngacmuar që në adoleshencë e fill prej atyre viteve, mori drejtim e duhur duke u realizuar profesionalisht e duke lobuar për të veçantë përtej oqeanit. Salihu ka përfunduar shkollën “Brio Academy” në Hartford të Connecticut dhe është i certifikuar si stilist. 

Është fitues i shumë çmimeve.  “Më duhet të flas shumë për Kosovën time të bukur. Atje u rrita dhe më besoni se ndiej mungesë të madhe për vendin tim. Çdoherë që bëj vizita nëpër Kosovë, e ndiej atë freskinë dhe kënaqësinë e vendit, traditat e popullit tim të dashur, që me të vërtetë më kthen pas në kohë për në viset e vendlindjes. Kam mall për gjakun e të parëve, për vendin ku linda”, ka thënë ai për “Gazeta shqiptare”.