Me 1500 biçikleta, kundër veturave dhe ngrohjes globale

Në mënyrë që njerëzit të heqin dorë nga automobilët, nevojiten më shumë rrugë për biçikleta dhe çmime më të ulëta për transporttin publik

Lëvizja protestuese klimatike e Bernës në një demonstrim me biçikleta ka provuar të tërheqë vëmendjen drejt faktit se trafiku (automoblistik) është bashkëfajtor për ngrohjen e klimës, shkruan bernerzeitung.ch.

Në demonstratë, sipas organizatorëve, kanë marrë pjesë rreth 1500 veta. Ata kanë kërkuar një kthesë në komunikacionin individual rrugor, transmeton albinfo.ch. Në mënyrë që njerëzit të heqin dorë nga automobilët, nevojiten më shumë rrugë për biçikleta dhe çmime më të ulëta për transporttin publik, si: trenat, tramvajët dhe autobusët.

Biçikletat ishin të stolisura në mënyrë të larmishme dhe me parolla si: “automobilët janë diçka nga shekulli 20”, ose “Më mirë t`u japim pedaleve se në kolonë të mbesim vonë”, etj.

Njëra ndër kërkesat kryesore të lëvizjes protestuese klimatike është shpallja e gjendjes emergjente të klimës në gjithë vendin. Në këtë mënyrë do të njihej më mirë nevoja për veprim urgjent në ndërprerjen e faktorëv që sjellin ngrohjen globale.

Gjendjen emergjente klimatike tashmë e kanë shpallur qytetet si: Bazeli, Olteni dhe Delemonti ndërsa në nivel kantoni, këtë e ka bërë deri tash vetëm Kantoni Vaud.

---