100 të vrarë dhe 500 të plagosur nga sulmet në 3 kisha dhe 3 hotele në Sri Lanka

Tre kisha dhe tre hotele me pesë yje në Sri Lanka janë goditur nga shpërthimet të dielën e Pashkëve. Sipas raportimeve thuhet se janë vrarë 100 vetë dhe plagosur mbi  500 të tjerë.

Shpërthimet e kishave thuhet se ndodhën gjatë shërbimeve të Pashkëve dhe në mesin e viktimave mund të ketë edhe turistë. Imazhet grafike dhe pamjet e ndara në mediet sociale tregojnë shkallën e shkatërrimit pas shpërthimeve vdekjeprurëse të mëngjesit të sotëm, transmeton “TCH”.

Një nga shpërthimet ndodhi në Kishën e Shën Anthonit në Kochcikade, Colombo, tjetri në Negombo, që është në veri të qytetit dhe i treti ka ndodhur në kishën që ndodhet në Batticaloa, përcjell albinfo.ch.

Tre hotele me pesë yje thuhet se janë goditur nga shpërthimet; ‘Shangrila’, ‘Cinnamon Grand’ dhe ‘Kingsbury’. Kisha e Shën Sebastianit në Katuwapitiya në Negombo publikoi fotografi të shkatërrimit brenda kishës në faqen e saj në Facebook, duke treguar gjak në pllakat dhe dysheme, dhe kërkoi ndihmë nga publiku.  Kryeministri i Sri Lanka, Ranil Wickremesinghe do të zhvillojë  një takim urgjent pas shpërthimeve, sipas raporteve.