Zvicra mbështet Kosovën edhe në OSBE

Ambasadori zviceran në OSBE, Gerard Stoudmann i premtoi ministrit Hoxhaj, ndihmën e Bernës zyrtare për avancimin e reformave integruese të Kosovës

Përfaqësuesi special i Konfederatës Zvicerane për Ballkanin Perëndimor gjatë presidencës zvicerane të OSBE-së, Gerard Stoudmann, i premtoi ministrit kosovar të Punëve të Jashtme, Enver Hoxhaj, ndihmën e Bernës zyrtare për avancimin e reformave integruese të Kosovës.

Sipas një kumtese lëshuar nga MPJ, ambasadori Stoudmann ka dhënë vlerësime pozitive për progresin në Kosovë, duke premtuar mbështetjen e shtetit zviceran për avancimin e mëtutjeshëm të reformave si dhe për agjendën multilaterale të Kosovës.

Këto komente ambasadori zviceran i bëri gjatë një takimi që zhvilloi me ministrin Hoxhaj. Ky i fundit e njoftoi diplomatin helvet për progresin në Kosovë, fuqizimin e shtetësisë dhe subjektivitetit ndërkombëtar.

Ai veçoi përkushtimin e Qeverisë së Kosovës për përmbushjen e agjendës integruese evropiane, si dhe angazhimin e fuqishëm të diplomacisë kosovare për anëtarësimin në organizata ndërkombëtare, në kuadër të agjendës multilaterale.

Ministri Hoxhaj gjatë takimit ka shprehur mirënjohjen e qytetarëve dhe Qeverisë së Kosovës për përkrahjen e gjithanshme të Zvicrës.

Hoxhaj dhe Stoudmann biseduan edhe për bashkëpunimin ndërmjet dy vendeve gjatë presidencës zvicerane të OSBE-së, në fokus të së cilës do të jetë avancimi i bashkëpunimit rajonal. Hoxhaj dhe Stoudmann po ashtu vlerësuan marrëdhëniet shumë të mira ndërshtetërore ndërmjet Kosovës dhe Zvicrës.

 Të dy bashkëbiseduesit theksuar vullnetin për avancimin e mëtutjeshëm të marrëdhënieve ndërmjet dy shteteve.