Haradinaj: “Kosovës i kthyem sovranitetin që e kishin dorëzuar në dialog”

Kryeministri i Kosovës, Ramush Haradinaj, tha se kur e ka marrë postin e kryeministrit, Kosova nuk kishte sovranitet, pasi e kishte dorëzuar në tavolinën e bisedimeve me Serbinë pa asnjë kusht, duke mos përfituar asgjë nga BE-ja.

Haradinaj këtë deklaratë e bëri në takimin e sotëm të organizuar nga Dega e AAK-së në Prishtinë.

Ai aty ka folur për dialogun me Serbinë, taksën dhe liberalizimin e vizave. Haradinaj ka thënë se qeverisja e tij e ka kthyer sovranitetin e Kosovës, që sipas tij, ishte dorëzuar në tavolinën e dialogut me Serbinë.

“Ne e kemi dorëzuar sovranitetin vetëm në dialog, vetëm në tavolinën e zonjës Mogherini, pra pa marrë asgjë, pa u bërë anëtar i BE-së, pa na trajtuar, pa na dhënë privilegjet që na takojnë. Atë sovranitet që e kemi arrit më 17 shkurt 2008, atë sovranitet i cili ka mbërritur me shumë dhimbje, me shumë mund, me shumë vuajtje, me shumë sakrifica… Disa filluan të bëjnë humor, thoshin se është ai i ‘sporteve të rënda’. Po, jam i sporteve të rënda, se më në fund kemi ushtri si e gjithë bota”, tha ai, raporton Kosovapress, përcjell Albinfo.ch.

Haradinaj po ashtu tregoi se kanë filluar të punojnë për hapje të vendeve të punës dhe se tani qytetarët e Kosovës nuk shkojnë në Gjermani si azilantë, por me viza të rregullta të punës.

Në aktivitetin e organizuar nga dega e AKK-së në Prishtinë, në këtë parti janë anëtarësuar 823 persona.