Arbëreshët, vlera të përbashkëta të Italisë dhe shqiptarëve

Kosova sot ka pritur delegacionin e komunave të arbëreshëve të Italisë.

Kryeministri i Kosovës, Ramush Haradinaj, në një ceremoni ka përshëndetur delegacionin.

“Ne dëshirojmë t’ ju ndihmojmë dhe t’ju përkrahim sikurse në ruajtjen e gjuhës, traditave e zakoneve, por po ashtu duam që të ndërlidhim dhe të shkëmbejmë në ekonomi, kulturë, e njëkohësiht edhe në ndjenja njerëzore të dashurisë”, tha kryeministri i Republikës së Kosovës, Ramush Haradinaj, në fjalën e tij, në pritjen e organizuar nën patronatin e kryeministrit​ për delegacionin e komunave të arbërshëve të Italisë.

Pasi falënderoi të pranishmit, kryeministri Haradinaj tha se beson shumë se lidhja jonë me arbëreshët nuk është vetëm lidhje e gjakut mes shqiptarëve, por kjo është një lidhje edhe e shqiptarëve në Itali.

Ky fakt, tha kryeministri Haradinaj, është një pasuri e përbashkët e Italisë dhe e shqiptarëve.

Ndërkaq, Rosario Petta, Kryetar i Bashkisë së Piana degli Albanesi, pasi falënderoi kryeministrin Haradinaj për mikpritjen, tha se ndihen të nderuar për respektin që ia kanë dhënë institucionet, duke shpresuar që ky të jetë fillimi i korridoreve të reja në mes të arbëreshëve dhe institucioneve të Kosovës dhe më gjerë.

Nga një fjalë e kanë mbajtur edhe zëvendëskryeministri dhe ministri i Diaporës, Dardan Gashi, kryetari i Komunës së Prishtinës, Shpend Ahmeti, zëvendësambasadori i Italisë, Matro Koradini, ndërsa në emër të arbëreshëve foli famullari i katedrales në Piana degli Albanesi, Papas Jani.

Në fund kryeministri Haradinaj u ka dhuruar pjesëmarrësve librin me portrete të Skënderbeut.