150 mijë turistë në muajt e parë të 2019 në Tiranë

Kryeqyteti i Shqipërisë, Tirana është kthyer në një qendër atraksioni turistik për turistë nga rajoni e  Evropa.

Drejtoreshë e Turizmit në bashkinë e Tiranës, Mirela Koçollari ka thënë për mediet lokale se gjatë muajve të parë të 2019-ës ka pasur një rritje me rreth 25% më shumë turistë në Tiranë, krahasuar me të njëjtën periudhë të një viti më parë, transmeton albinfo.ch.

”Ka një rritje të fluksit të turistëve dhe të Tiranës si destinacion, dhe gjatë 2019 janë 150 mijë turistë që e kanë vizituar kryeqytetin. Kryesisht turistët që vizitojnë Tiranën vijnë nga vende që kanë linja direkte, ku pjesa më e madhe janë gjermanë, italianë, por ka nga Turqia dhe nga Kina”, theksoi Koçollari.

Ajo tha se, atraksionet më të frekuentuara nga turistët janë pjesa qendrore e Tiranës, si sheshi ‘Skënderbej’, Pazari i Ri si dhe Muzeu Historik Kombëtar e Muzeu i Gjetheve.

Ajo shtoi se së shpejti qytetit të Tiranës do i shtohet dhe një atraksion i ri, që do jetë shtëpia muze e shkrimtarit Ismail Kadare.