Zgjidhen anëtarët e Task-forcës për krimet e luftës

Këshilli Prokurorial i Kosovës ka themeluar dy mekanizma, të cilët janë përcaktuar në strategjinë për krimet e luftës, Task-forca për përpunimin e analizës së resurseve, si dhe trupi monitorues për monitorimin dhe vlerësimin e efikasitetit dhe efektivitetit të zbatimit të kësaj strategjie.

Zëvendëskryetari i KPK-së, Arben Ismaili, Prokurorja Speciale, Drita Hajdari dhe  drejtori për Hetimin e krimeve të rënda, Fadil Gashi, do të jenë në krye të Task-forcës për krimet e luftës, përcjell albinfo.ch.

Ky vendim është marrë në mbledhjen e Këshillit Prokurorial të Kosovës.

Ndërsa, anëtarë të grupit monitorues për zbatimin e strategjisë për krimet e luftës do të jenë: kryeprokurori i Shtetit, Aleksandër Lumezi, kryesuesi i KPK-së, Bahri Hyseni, nga Policia e Kosovës drejtori i Departamentit për Hetim, Riza Shillova, nga Ministria e Drejtësisë, Afrim Kasolli, si dhe një përfaqësues i BE-së që mbetet të caktohet.

Ndërsa prapa dyerve të mbyllura, Këshilli Prokurorial i Kosovës i ka propozuar presidentit të vendit shkarkimin nga detyra të prokurorit Agron Matjani për shkak të mosrespektimit të rëndë të detyrave zyrtare.

Ky vendim, sipas KPK-së, është bërë pas zhvillimit të procedurave disiplinore nga komisioni përkatës.

Gjithashtu, një tjetër prokurore është suspenduar nga detyra me pagesë pas dyshimeve për shkelje të detyrës zyrtare.