Nuk ka gara të Formula E në Zvicër sezonin e ardhshëm

Pas garave në Cyrih dhe Bernë më 2018 dhe ato që do mbahet më 2019 , vendi nuk do të presë ndonjë garë tjetër Formula E në sezonin e ardhshëm.

Të premten, organizatorët prezantuan kalendarin e sezonit 2019/20, i cili do të shfaqë 14 gara, në 12 qytete. Gara e parë e sezonit të ri do të mbahet në Ad Diriyah në Arabinë Saudite në nëntor 2019 dhe ajo e fundit në korrik 2020, në Londër.

Megjithatë, Zvicra nuk figuron në kalendarin e ri të garave. Tifozët do të duhet të kënaqen  me garën e vetme të Formula E në kryeqytetin zviceran të Bernës më 22 qershor, përcjell albinfo.ch.

Gara me motor u kthye në Zvicër më 2018 me Formula E në Cyrih, e cila tërhoqi mbi 100,000 spektatorë. Kjo ishte hera e parë për 63 vjet që gara motorike u lejua në tokën zvicerane, sepse u ndalua pas një aksidenti, në të cilin vdiqën 84 vetë.