Nuk pati trafikim organesh në Kosovë

"Nuk ka dëshmi se gjatë luftës është bërë trafikim i organeve në Kosovë", ka thënë kryeprokurori Willimason, duke hedhë poshtë pretendimet e senatorit zviceran, Dick Marty

Kryeprokurori amerikan, Clint Williamson, i cili udhëhoqi Task Forcën e hetimeve speciale të Bashkimit Evropian lidhur me pretendimet e senatorit zviceran Dick Marty, ka arritur në përfundim se në Kosovë nuk ka pasur trafikim organesh gjatë luftës së fundit të vitit 1999.

“Nuk ka dëshmi se gjatë luftës është bërë trafikim i organeve në Kosovë”, ka thënë Willimason, duke hedhë poshtë pretendimet e senatorit zviceran, raporton Klan Kosova.

Ky medium merr vesh se ky është përfundimi i hetimeve të kryeprokurorit Williamson. Raporti i tij, i paraparë të publikohet në qershor, është shtyrë për dy muaj dhe do të shfaqet në gusht.

Pasi këtij hetimi, Williamson, ish-shef i komponentes së Drejtësisë në Administratën e UNMIK-ut, do të largohet nga kjo detyrë, pasi që hetimet për trafikim organesh ishin misioni i tij. Burimet ndërkombëtare kanë thënë, se ai do të zëvendësohet nga një tjetër prokuror amerikan.

Prokurori i ardhshëm do të hetojë 12 raste të tjera për krime lufte, për të cilat Task Forca aktuale e Willamsonit ka gjetur fakte të jenë kryer në Kosovë pas ndërhyrjes së KFOR-it (12 qershor).

Ato raste janë individuale dhe nuk përfshijë ndonjë ndërmarrje të organizuar. Aktakuzat për këto 12 raste, siç merret vesh KK, do të ngritën diku ka fundi i vitit.