PDK dhe Aleanca kërkojnë seancë urgjente për ndryshimet në Ligjin për Specialen

Deputetët e opozitës kërkojnë që Kuvendi të mblidhet më 3 tetor dhe projektligji të trajtohet në dy lexime

Partia Demokratike e Kosovës dhe Aleanca për Ardhmërinë e Kosovës kanë kërkuar që Kuvendi i Kosovës të mblidhet sot, më 3 tetor, për të shqyrtuar dhe votuar ndryshimet në Ligjin për Dhomat e Specializuara. Kërkesa vjen pasi Qeveria e ka përcjellë në Kuvend projektligjin për plotësim-ndryshimin e këtij ligji, përcjell albinfo.ch.

Deputetja e PDK-së, Ariana Musliu-Shoshi, ka kërkuar që procedura parlamentare të nisë menjëherë, duke theksuar se projektligji duhet të trajtohet dhe të votohet në të dy leximet. Sipas saj, afati prej 72 orësh ndërmjet dy leximeve e bën të nevojshme që procedura të fillojë gjatë seancës së sotme.

Musliu-Shoshi ka kërkuar gjithashtu që paralelisht me procedurën parlamentare të ndërtohet një strategji juridike dhe diplomatike për procesin e apelimit të vendimit të 16 shtatorit, me përfshirjen e ekspertëve vendorë dhe ndërkombëtarë.

Ndërkohë, deputeti i Aleancës, Burim Ramadani, ka bërë thirrje për thirrjen e menjëhershme të seancës. Ai ka kërkuar që ndryshimet në ligj të hidhen në votim, duke iu referuar edhe protestave të zhvilluara gjatë ditëve të fundit.

Kërkesat e dy subjekteve opozitare vijnë në një kohë kur në Kuvend është ngritur çështja e ndryshimit të Ligjit për Dhomat e Specializuara. Më 30 shtator, Komisioni për Legjislacion bëri të ditur se projektligji ishte përcjellë për mendim ligjor dhe se, pas kthimit në Kuvend, do të shqyrtohej me urgjencë./Albinfo.ch 

---