Nis ndërtimi i Autostradës Prishtinë- Hani i Elezit

Me idenë e kryeministrit në detyrë, Hashim Thaçi, Autostrada Prishtinë-Hani i Elezit do të mbajë emrin e intelektualit tetovar “Arbër Xhaferi

Të enjten, zyrtarisht ka filluar ndërtimi i Autostradës Prishtinë-Hani i Elezit e njohur si “Rruga 6”. Kjo autostradë që lidhë Prishtinën me kryeqytetin e Maqedonisë-Shkupin do të jetë e gjatë 55 kilometra, ndërsa do të ndërtohet nga kompania turko-amerikane, Bechtel-Enka.

 

Nisja e punimeve u bë zyrtarisht në një ceremoni që u zhvillua në fshatin Uglar të Fushë-Kosovës, ku ishin të pranishëm përfaqësues të institucioneve të Kosovës, ata të Maqedonisë, si dhe diplomatë ndërkombëtarë të akredituar në Kosovës.

 

Me kërkesën e kryeministrit në detyrë, Hashim Thaçi kjo rrugë do të quhet “Arbër Xhaferi”.

 

“Sapo nisëm ndërtimin e autostradës Prishtinë – Hani i Elezit duke bërë një hap të rëndësishëm drejt modernizimit të mëtutjeshëm të infrastrukturës së Kosovës. Kjo autostradë do të shërbejë si një arterie e zhvillimit ekonomik, do t’i bashkojë më shumë shqiptarët dhe do ta integrojë vendin tonë në rrjetet kryesore mbarë-evropiane të transportit”, deklaroi në fillim Hashim Thaçi.

 

“Ky projekt madhor shënon fillimin e jetësimit të Misionit të R, do të marrë emrin e intelektualit të shquar shqiptar Arbër Xhaferi”, tha ai.

 

Ndërsa, ministri i Infrastrukturës, Fehmi Mujota tha se kontrata për këtë projekt është ndër më të mirat. Ai tha se për dy vjet sa është punuar në këtë projekt janë respektuar të gjitha procedurat ligjore.

 

Zëvendëskryeministri i Maqedonisë, Musa Xhaferi tha se kjo autostrade ka një rëndësi të veçantë sepse bashkon shqiptaret. Ai tha se kjo rrugë do të jetë një urë lidhëse mes shqiptarëve dhe do të fillojë një afërsi, një kohezion social, ekonomik, vëllazëror mes dy anëve.

 

Në anësen tjetër përfaqësuesit e opozitës dhe ata të shoqërisë civile, e kanë kundërshtuar nënshkrimin e kontratës nga ana e Qeverisë me kompaninë “Bechtel&Enka në vlerë 600 milionë euro.

 

Drejtori Ekzekutiv i Institutit GAP, Agron Demi, ka thënë se Prokuroria e shtetit nuk do të duhej të lejonte nënshkrimin e kontratës me “Bechtel&Enkan”, pa u sqaruar dyshimet e shumta në kontratën e kaluar të së njëjtës kompani me Qeverinë për ndërtimin e Autostradës se Kombit.

 

Ndërkaq Abdullah Hoti nga Lidhja Demokratike e Kosovës, ka thënë se kjo kontratë nuk është dashur të nënshkruhet në një kohë të tillë transitore. Visar Ymeri, nga lëvizja “Vetëvendosje”, po ashtu e kundërshton veprimin e Qeverisë për të nënshkruar këtë kontratë.

 

Kjo autostradë parashihet të kryhet brenda 42 muajsh nga dita e sotshme. Ndërtimi i Rrugës 6, që deri në kufirin me Maqedoninë është rreth 55 kilometra iu ka besuar kompanisë turko-amerikane, Bechtel-Enka, e cila ka ndërtuar edhe autostradën “Ibrahim Rugova”.

---