Gjykatat, 119 mijë lëndë të pazgjidhura

Mbi 104 mijë lëndë janë nga fusha civile, 15 mijë e 329 janë nga ajo penale, ndërsa numri më i madh lëndëve të pazgjidhura vijnë nga rajoni i Prizrenit dhe Gjilanit

Gjykatat e Kosovës shpeshherë i ngjajnë objekteve arkivore, për nga numri i madh i dosjeve të pa ekzekutuara që flejë nëpër rafte. Sipas një statistike të dhënën nga Këshilli Gjyqësor, janë mbi 119 mijë lëndë të paekzekutuara që presin zgjidhje nga ana e gjykatësve kosovarë.

Mbi 104 mijë lëndë janë nga fusha civile, 15 mijë e 329 janë nga ajo penale. Ndërsa, numri më i madh lëndëve të pazgjidhura është nga rajoni i Prizrenit, i ndjekur nga Gjilani e Peja. Në këtë mes Prishtina duket se është pak më mirë, edhe pse e ka numrin më të madh të banorëve në vend.

Ky numër lëndësh nuk po e frikëson kryesuesin e Këshillit Gjyqësor të Kosovës, Enver Peci. Ai tha se 800 mijë lëndë të tilla i ka Maqedonia, citon Koha. Shumicën e këtyre lëndëve, sipas Pecit, e përbëjnë borxhet e qytetarëve ndaj KEK-ut, ujësjellësit e kompanive të pastrimit.

Në mesin e lëndëve të paekzekutuara është edhe ajo e Alinexhat Zeqirit, Abdulxhemi Zeqirit dhe Samet Ramadanit. Pronën e tyre prej 254 metrash katrorë e mban Behxhet Makolli qe 13 vjet. Lokali i tyre gjendet përballë hotelit “Grand” dhe njihet si “Bulevardi”.