Gjilani pritet të nënshkruaj marrëveshje me GIZ-in

Kryetari i Gjilanit, Haziri dhe përfaqësuesi i kompanisë gjermane GIZ, Kai Hofmann janë duke shqyrtuar mundësinë për nënshkrimin e një marrëveshje 3 vjeçare bashkëpunimi

Përfaqësuesit e Komunës së Gjilanit dhe ata të kompanisë gjermane GIZ, po shqyrtojnë mundësinë për nënshkrimin e një marrëveshje bashkëpunimi për tri vitet e ardhshme.

Kështu u tha të hënën pas një takimi që kryetari i Gjilanit, Lutfi Haziri zhvilloi me një  delegacion nga organizata GIZ, që kryesohej nga Kai Hofmann.

Haziri ka falënderuar Hofmannin për vizitën në Gjilan, ndërsa kanë biseduar për prioritetet e qeverisjes së Gjilanit, për menaxhimin e mbeturinave, partneritetin publiko-privat, menaxhimin e kualitetit brenda Komunës etj.

Përfaqësuesit e GIZ-it, siç thuhet në njoftim, thanë se janë të interesuar që të lidhin partneritet 3-vjeçar me komuna të ndryshme dhe kanë ardhur për t’i parë prioritetet edhe në Gjilan, përderisa nga ana e tij, kryetari Lutfi Haziri tha se Komuna e Gjilanit po bënë përpjekje për bashkëpunim kualitativ dhe pret përgjigje pozitive nga GIZ-i.

Ndryshe, Gjilani është njëri nga komunat që ka përfituar më së shumti nga organizatat ndërkombëtare, kryesisht ato zvicerane që kanë investuar dhjetëra miliona euro vetëm në ujësjellës.