40 për qind të të punësuarve nuk paguajnë taksa

Qendra Shqiptare për Kërkime Ekonomike në një raport publikuar së fundi thotë se në Shqipëri rreth 40 për qind e bizneseve nuk paguajnë kontribute ndaj shtetit

Rreth 40 për qind e të punësuarve në Shqipëri nuk paguajnë asnjë taksë ndaj shtetit, duke sjellë kështu reduktim të kontributeve shoqërore si dhe zhvillim të një konkurrence të pandershme mes bizneseve. Kështu të paktën thuhet në raportin e fundit të Qendrës Shqiptare për Kërkime Ekonomike.

Milva Ikonomi është eksperte e ekonomisë. Në një analizë ajo sqaron se nga viti 2007 deri në vitin 2012, bizneset nuk kanë ulur pagat edhe pse nuk kanë rritur investimet, çka ka ndihmuar në kapërcimin e krizës më lehtë.

“Po flasim për shkallën e gape-t midis atyre që kanë qenë të punësuar dhe atyre që kanë qenë kontribuues. Në vitin 2007 shkalla e gape-t ishte 12 për qind, ndërsa në vitin 2012 shkoi 40 për qind. Në Shqipëri mbizotëron ndërmarrja e vogël, me pak punonjës, biznesi me lidhje nepotike. Pikërisht kjo ka shërbyer për të mos lejuar rënien e pagave në sektorin privat”, shpjegon Ikonomi.

Ajo sqaron se shumë biznese në Shqipëri janë me lidhje familjare, çka ndikon që shpesh vendimet të mos jenë të drejta.

“Kur ndërmarrja realizon bilancin e vet ekonomik, ka gjithmonë parasysh që një pjesë të fitimit ta çojë drejt fondit të pagave dhe një pjesë ta lërë për të bërë investime. Shumë vende të rajonit ulën pagat e punonjësve dhe jo investimet, ndërsa në Shqipëri nuk u ulën pagat në kohën e krizës”, konsideron ajo, raporton TCH.

Sipas raportit, pagat në sektorin publik janë mesatarisht 25 për qind më të larta se pagat në përgjithësi.

Pothuajse 60 për qind e të punësuarve përfitojnë nga të ardhurat të barabarta me pagën minimale. Transporti dhe telekomunikacioni, sipas raportit, i kanë pagën më të lartë, me një mesatare prej 55 mijë lekësh (rreth 400 euro), më pas vjen industria dhe ndërtimi me 35 mijë (250) dhe në fund është sektori i shërbimeve.