S’ka rrezik që Shqipërisë t’i kthehen vizat

Pavarësisht numrit të lartë të azilkërkuesve në vendet e Evropës, nuk ka asnjë rrezik që Shqipërisë t’i kthehen vizat.

Këtë premtim e ka dhënë në Tiranë ministri i Brendshëm gjerman, Thomas de Maiziere.

Ky i fundit tha se nga Shqipëria vetëm 2 për qind e kërkesave pranohen, ndërsa u dërgoi shqiptarëve mesazhin se kërkesat për azil nuk janë rruga e duhur.

“Me këtë rast dëshiroj t’u bëj një apel qytetarëve shqiptarë që të mos e ndjekin këtë rrugë, sepse kjo është një rrugë e vështirë, ilegale dhe nuk ka asnjë shans për të qëndruar nëpërmjet saj në Gjermani. Rreziku për kthimin e vizave për Shqipërinë nuk ekziston”, deklaroi De Maiziere.

Ndërsa ministri francez i Brendshëm, Bernard Cazeneuve, deklaroi se qeveria shqiptare po bën hapa seriozë në luftën kundër trafikut të drogës, ndaj Franca do të bashkëpunojë ngushtë me të në këtë luftë.

Nga ana  tjetër, zyrtarët në Tiranë thanë se marrja e statusit të vendit kandidat nuk është një eufori, por shtysë drejt luftës së krimit dhe korrupsionit.

Dy ministrat, De Maiziere dhe Cazeneuve, ishin të ftuar në Tiranë nga ministri i Brendshëm shqiptar, Tahiri.

Ministrat e Brendshëm të Francës dhe të Gjermanisë u priten edhe nga kryeministri Rama.