Hajvalia organizon program kulturor për ta nderuar diasporën

Foto ilustrim © 2017 ALBINFO.CH

Organizimeve mikpritëse për diasporën i është bashkuar edhe rinia e Hajvalisë në Prishtinë, përcjell albinfo.ch.

Nën organizimin “Dashuri, mall e shpresë – Kontributi i mërgimtarëve tanë ndër vite”, rinia e Hajvalisë do të mirëpresë mërgimtarët, duke filluar nga data 1 gusht, në oborrin e shkollës “Shkëndija” në Hajvali.

Një ndër organizatorët, Burim Krasniqi, ka njoftuar për albinfo.ch se është hera e parë që në Hajvali po organizohet një aktivitet i tillë për nder të mërgimtarëve.

Krasniqi ka thënë se aktiviteti po ashtu do të shërbejë si mundësi për të shkëmbyer ide dhe përvoja mes të rinjve nga Kosova dhe diaspora.

“Do të jenë të ftuar mbarë mërgata pa dallim, e ideja dhe motivi i këtij organizimi është për të bashkuar mërgatën shqiptare nga gjithë bota, ku jetojnë, dhe për t’i falënderuar për të gjitha që kanë bërë për ne ndër vite nëpër kauza të ndryshme”, ka njoftuar Krasniqi.

Në kuadër të këtij programi, sipas organizatorëve, do të performojnë Ansambli i Valleve dhe Këngëve “Hajvalia”, Maki Maliqi, Meda, e Gold Ag.

Pos Burim Krasniqit, disa nga të rinjtë që po e organizojnë këtë program janë Xheladin Fazliu, Musa Kqiku, Fatbardha Fejzullahu, Lulzim Demaj, Dardan Ibrahimi e të tjerë.