Gjilani, mikpritje për fëmijët e mërgimtarëve

Lutfi Haziri priti një grup fëmijësh nga diaspora, të cilët i njoftoi lidhur me veçoritë e komunës. Ndërsa këshilltarët propozuan zyrtarisht Xherdan Shaqirin “qytetar nderi”

Një grup i fëmijëve shqiptarë që jetojnë në vendet e ndryshme të Evropës, Gjermani, Zvicër, Angli, Turqi dhe Greqi, kanë vizituar Komunën e Gjilanit, ndërsa nga kryetari Lutfi Haziri janë njoftuar për të gjitha veçoritë e kësaj komune, por edhe bukuritë e Anamoravës si rajon lindor i Kosovës.

Këta fëmijë të shoqëruar nga drejtoresha e qendrës kulturore të Kosovës për Zvicër, Shukrije Ramadani, vizituan Gjilanin në kuadër të Ditëve të Diasporës.

Kryetari i Gjilanit, Haziri tha se mbi 32 për qind e gjilanasve jetojnë në shtete të Evropës, dhe janë shumë të lidhur me familjet e tyre në Gjilan ku ndihmojnë jashtëzakonisht shumë në të gjitha aspektet.

Fëmijët e pranishëm i bënë disa pyetje nga më të ndryshme kryetarit Haziri, të cilëve u është përgjigjur me kënaqësi.

Nga ana e saj, Shukrije Ramadani ka falënderuar kryetarin e Komunës së Gjilanit Lutfi Hazirin që edhe në këtë ditë pushimi ka gjetur kohë t’i presë e t’i nderojë fëmijët shqiptarë që jetojnë në shtete të ndryshme të Evropës. Shukrije Ramadani është bashkëshortja e dëshmorit Agim Ramadani.

Se Gjilani di t’i respektojë djemtë e saj në diasporë, dëshmon iniciativa e këshilltarëve komunal për ta shpallur Xherdan Shaqirin, qytetar nderi të Gjilanit.

Avdyl Aliu, shef i grupit të këshilltarëve komunalë (LDK), i cili e ka publikuar këtë nismë, në një konferencë me gazetarë, ka thënë se motivacion kryesor për shpalljen e Shaqirit qytetar nderi, janë sukseset e tij në futboll, që shkojnë përtej çdo futbollisti tjetër shqiptar.

Xherdani shkëlqeu në botërorin 2014, ku u rendit në mesin e futbollistëve më të mirë në botë, krahas Messit dhe të tjerëve. Aliu tha se pret që Xherdan Shaqiri do të jetë vetë i pranishëm në Gjilan, kur t`i akordohet titulli Qytetarë Nderi. Këtë titull e kanë marrë më herët studiuesi Mehemt Halimi dhe ish-senatori amerikan Bob Dol.