Kompania që shet ajrin nga Zvicra, ‘fiton’ një çmim interesant

“Alps Initiative” theksoi se transportimi i produktit në vende si Tajlanda prodhon jashtëzakonisht më shumë dyoksid karboni se sa thjesht të thithësh ajrin e alpeve

Një kompani zvicerane që tregton shishe me ajër alpin drejt Azisë është mes të përzgjedhurve për të fituar “especially absurd shipping award” (çmimi i tregtimeve veçanërisht absurde) nga shoqata “Alps Initiative”, një grup që lufton transportet e pakuptimta me ndikim në mjedis.

Ndërkohë që kompania “Swiss Air Deluxe” pretendon se produktet e saj janë shumë të mira për mushkëritë, zemrën dhe fuqinë, nga ana tjetër “Alps Initiative” theksoi se transportimi i produktit në vende si Tajlanda prodhon jashtëzakonisht më shumë dyoksid karboni se sa thjesht të thithësh ajrin e alpeve, transmeton ATSH.

Në vend të dytë renditet uji “Voss” nga Norvegjia që transportohet për më shumë se 1500 kilometra me anije dhe kamionë deri në supermarketet “Swiss Migros”, përcjell albinfo.ch.

Produkti që renditet i treti në këtë garë është një proshutë që prodhohet nga derra të rritur në Danimarkë mishi i të cilëve trajtohet në Itali para se të paketohet në Austri dhe të shitet nga gjiganti i supermarketeve në Zvicër, “Aldi”.

---