Zvicra, përparim në luftën kundër racizmit

Ajo ka marrë komplimente sidomos për programet kantonale të integrimit (KIP) për njerëzit me prejardhje të huaj etj.

Viteve të fundit Zvicra ka arritur rezultate të mira në luftën kundër racizmit, gjegjësisht ka përmirësuar pozitën e saj në këtë drejtim. Ky është konstatimi i raportit që ka publikuar të martën Komisioni Kundër Racizmit i Këshillit të Evropës.  Komisioni në fjalë ka lavdëruar “angazhimin në vazhdimësi të autoriteteve zvicerane dhe gjykimin e padyshimtë që ato i bëjnë racizmit dhe ksenofobisë”.

Ai ka dhënë komplimente sidomos për programet kantonale të integrimit (KIP) për njerëzit me prejardhje të huaj, pastaj arsimimin më të mirë të policëve në lëmin e të drejtave të njeriut si dhe ofertat e disa kantoneve në mbështetje të personave LGBT (lesbike, homoseksuale, biseksuale dhe transseksuale).

Por, sipas raportit në fjalë në Zvicër vazhdon të ketë njerëz që diskriminohen. Në radhë të parë si të diskriminuar konsiderohen romët dhe jenische (grup etnik shëtitës) si dhe njerëzit me ngjyrë. Këta të fundit janë më shpesh se të tjerët cak i kontrollimit të policisë, vetëm nga shkaku i lëkurës së zezë, konstaton raporti.

Por, ndër kategoritë e goditura më shpesh nga diskriminimi në Zvicër edhe më tutje bëjnë pjesë edhe homoseksualët dhe lesbiket. Për këtë arsye, komisioni kundër Racizmit rekomandon që edhe orientimi seksual të përfshihet në normën kundër racizmit.

Diskriminimi vazhdon të jetë aktual edhe në fushën e punësimit të të huajve.