Greqia e Gjermania, plane ambicioze investimesh

Kryeministri grek, Kyriakos Mitsotakis, ka siguruar marrëveshje me kancelaren gjermane, Angela Merkel, për promovimin e investimeve në energjetikë dhe ekonominë e gjelbër, siç shpjegohet në deklaratat pas takimit të mbajtur në Berlin.

“Ne duam të fillojmë së bashku me kancelaren një plan ambicioz investimesh në ekonominë e gjelbër, energjinë e rinovueshme, menaxhimin e mbeturinave dhe energjinë elektrike”, theksoi ai.

Plani përfshin kompaninë greke të energjisë ”Public Power Corporation” (PPC), që aktualisht është “në një fazë shumë të vështirë” sipas kryeministrit, i cili tha se qeveria po merr “masa drastike për ristrukturimin e saj”.

”Por, që PPC të rikthehet në treg, duhet të bëhen investime dhe kompanitë gjermane kanë njohuri dhe interesa në sektorin e energjisë. Bashkëpunimet e radhës do të përfshijnë trajnime teknike, ku gjermanët kanë përvojë”, shtoi ai.

Delegacioni grek nuk e fshehu kënaqësinë për rezultatet e takimeve me Angela Merkel dhe ministrin e Financave, Olaf Scholz, shkruan AlsatM, përcjell Albinfo.ch.