Trump shkarkon këshilltarin Bolton, njeriun që nuk pëlqente pavarësinë e Kosovës

Presidenti i SHBA-së, Donald Trump ka shkarkuar nga detyra, këshilltarin për Siguri Kombëtare në Shtëpinë e Bardhë, Xhon Bolton

Donald Trump ka shkarkuar nga detyra, këshilltarin për Siguri Kombëtare në Shtëpinë e Bardhë, Xhon Bolton. Këtë vendim e ka bërë të ditur nëpërmjet rrjeteve sociale.

Sipas asaj që presidenti Tramp shkruan në Twiter, ai dhe Bolton nuk kishin të njëjtat parime për shumë çështje.

“Xhon Bolton është njoftuar mbrëmë se Shtëpia e Bardhë nuk ka më nevojë për shërbimet e tij. Nuk jam pajtuar me shumë sugjerime të tij, përfshirë edhe sugjerimet për administratën amerikane, ndaj dhe i kam kërkuar dorëheqjen. Bolton e ka bërë këtë mëngjesin e sotëm. Dua ta falënderoj Bolton për punën e tij”, – shkruan Trump në twiter.

Kujtojmë se Këshilltari i presidentit Donald Trump për Sigurinë Kombëtare, John Bolton, në një opinion të shkruar në bashkëpunim me Lawrence Eagleburger dhe Peter W. Rodman, shprehet kundër shpalljes së pavarësisë së Kosovës.

Tre opinionistët madje i bëjnë thirrje presidentit të atëhershëm amerikan, George W. Bush, që të rishqyrtojë politikën e Amerikës në Kosovë; të marrë parasysh shqetësimet e Serbisë mbi atë çështje; të mos krijojë përplasje me Rusinë dhe të ndalojë njohjen e pavarësisë së Kosovës derisa rishqyrtimi të ketë përfunduar, përcjell albinfo.ch.

---