Qeveria e Cyrihut do të fusë në fuqi të drejtën e votës për të huajt

Bëhet fjalë për ata të huaj që ende nuk i kanë mbushur 10 vite qëndrimi në Zvicër, kështu që nuk mund të bëjnë kërkesën për pasaportën zvicerane

Në Kantonin e Cyrihut, komunat do të kenë mundësi të fusin në fuqi të drejtën e të huajve për të votuar dhe për t`u votuar në nivel komunal, shkruan sda.ch.  Këtë të drejtë do ta fitonin ata të huaj që janë duke jetuar së paku dy vite në komunën e njëjtë, transmeton albinfo.ch.

Bëhet fjalë për ata të huaj që ende nuk i kanë mbushur 10 vite qëndrimi në Zvicër, kështu që nuk mund të bëjnë kërkesën për pasaportën zvicerane.

Këtë kërkesë e ka bërë Qeveria e Qytetit të Cyrihut, e drejtuar prej më shumë se dhjetë vitesh nga Corine Mauer, politikane e Partisë Socialdemokrate, shkruan albinfol.ch. Sipas iniciatorëve, me ndihmën e një iniciative zyrtare duhet që së pari të bëhet përshtatja përkatëse e kushtetutës së kantonit.

Qeveria e qytetit tregohet e bindur se hyrja në fuqi e të drejtës së votës për të huajt, do të forcojë demokracinë dhe unitetin në shoqëri.

Ndryshe nga gjendja në kantonet tjera, Kantonit të Cyrihut i mungon baza ligjore e cila do të mundësonte që komunat të vendosin në mënyrë të pavarur për futjen në fuqi të një të drejte të tillë.

Vlerësohet se në qytetin e Cyrihut jetojnë të paktën 42.000 të huaj të moshës madhore që plotësojnë kriterin e kohës sa jetojnë në komunë të njëjtë por nuk e plotësojnë kriterin e kohës së qëndrimit në Zvicër. Nisur nga kjo, Qeveria e Cyrihut konsideron të padrejtë që një numër kaq i madh i qytetarëve të Cyrihut të përjashtohen nga e drejta e participimit politik.

---