Agjencia Zvicerane për Zhvillim dhe Bashkëpunim (SDC) dhe Ministria e Shëndetësisë, përmes projektit ‘Shëndet për të gjithë’ ka mundësuar rehabilitimin e qendrave shëndetësore të Dibrës, Fierit dhe Tiranës.
Ministrja e Shëndetësisë dhe Mbrojtjes Sociale, Ogerta Manastirliu, vizitoi qendrën e saporindërtuar në Sauk, e shoqëruar nga drejtori i projektit ‘Shëndet për të gjithë’, Besim Nuri dhe zv. kryetarja e Bashkësisë në Tiranë, Anisa Ruseti.
Rinovimi është pjesë e mbështetjes që jepet nga projekti ‘Shëndet për të gjithë’ për përmirësimin e kujdesit shëndetësor parësor në Shqipëri. Banorët e zonave rurale, në veçanti, mund të përfitojnë shumë nga aksesi në qendra të cilat janë pranë tyre.
“Falënderoj ‘Shëndet për të gjithë’ dhe Qeverinë zvicerane për mbështetjen e tyre në rehabilitimin e 16 qendrave shëndetësore në Dibër, Fier dhe Tiranë, por edhe për trajnimin e vyer të stafit mjekësor, për ofrimin e paketës së plotë të kujdesit parësor me cilësi për qytetarët”, tha ministrja Manastirliu.
Nga ana tjetër, Drejtor Ekzekutiv i projektit ‘Shëndet për të gjithë’, Besim Nuri, ka thënë se projekti ynë kontribuoi me një paketë prej 3 millionë frangash zvicerane nga Qeveria e Zvicrës.
‘Shëndet për të Gjithë’ është një projekt i qeverisë zvicerane që synon të forcojë kujdesin shëndetësor parësor në Shqipëri – një fushë parësore për vendin.
