Drejtori i Përgjithshëm i Policisë së Kosovës, Gazmend Hoxha, ka dhënë dorëheqje nga kjo pozitë, pesë ditë pas vrasjes së Arlinda Zekajt nga ish-kunati i saj, transmeton albinfo.ch.
Lajmin e ka bërë të ditur kryeministri Albin Kurti, i cili ka njoftuar se të premten ka pranuar kërkesën për dorëheqje të Hoxhës dhe e ka liruar atë nga detyra.
Pas këtij vendimi, Kurti, me propozim të ministrit të Punëve të Brendshme, Xhelal Sveçla, ka caktuar Fehmi Hotin ushtrues detyre të Drejtorit të Përgjithshëm të Policisë së Kosovës.
Qeveria, përmes njoftimit, ka vlerësuar kontributin dhe angazhimin e Gazmend Hoxhës gjatë mandatit të tij.
Dorëheqja vjen në një kohë kur institucionet e sigurisë dhe drejtësisë po përballen me reagime lidhur me trajtimin institucional të rastit të Arlinda Zekajt.
Të enjten, Policia e Kosovës pezulloi nga puna 11 zyrtarë policorë, në kuadër të masave për trajtimin e këtij rasti. Mes tyre janë ushtruesi i detyrës së drejtorit rajonal të Policisë në Pejë, shefi i hetimeve rajonale, komandanti dhe zëvendëskomandanti i stacionit policor, si dhe zyrtarë të tjerë të hetimeve dhe operativës.
Për të njëjtin rast janë pezulluar edhe kryeprokurorja e Prokurorisë Themelore në Pejë, Lumturije Vuçetaj, dhe prokurorja e rastit, Arlinda Nallbani Gacaferri./Albinfo.ch
