Qyteti evropian vë taksa ekstra për turistët

Nga janari i 2020-ës vizitorët e huaj do të kenë një kosto prej 3 eurosh për person, për të qëndruar një natë në hotel, përveç tarifës 7 % të qëndrimit në hotel

Në përpjekjen e tij më të fundit për të goditur fluksin e jashtëzakonshëm të turistëve, Amsterdami është gati të implementojë një tjetër “barrë” mbi udhëtarët, një lëvizje që pritet ta bëjë atë qytetin evropian me taksat më të rënda.

Duke filluar nga janari i 2020-ës vizitorët e huaj do të kenë një kosto prej 3 eurosh për person, për të qëndruar një natë në hotel, përveç tarifës 7 % të qëndrimit në hotel. Edhe ata që do të marrin me qira apartamente e dhoma në AIRBNB do të paguajnë një tarifë të rritur në 10 %.

Zëdhënësja e kryetarit të Bashkisë së Amsterdamit, Vera Al, u shpreh për CNN: “Fakti që numri i turistëve po shtohet dita-ditës, është një problem që ne nuk duam ta zgjidhim duke ndërtuar një mur përreth qytetit.

Rritja e taksës nuk është për të ndikuar te numri i turistëve, por çështje principesh. Ka shumë shpenzime për ta mbajtur qytetin tonë të pastër dhe të sigurt, si edhe infrastrukturën tonë në një gjendje të mirë”, deklaroi ajo, transmeton Scan.

Amsterdami po përpiqet të përballet me problemin e mbipopullimit të turistëve edhe në mënyra të tjera, duke vendosur taksa në lëvizjen me jahte deri në 8 euro për person, përcjell albinfo.ch.

“Për të kontrolluar fluksin e vizitorëve dhe në mënyrë që të përdorim avantazhet që turizmi sjell, ne duhet të veprojmë tani. Në vend të promovimit të destinacioneve është koha për menaxhimin e destinacioneve”, njoftoi agjencia e bordit të turizmit në një dokument strategjik, i cili pritet të përballojë sfidat e turizmit në Holandë midis vitit të tanishëm deri në 2030-ën.

Numri i vizitorëve në Holandë pritet të rritet me 50 % deri në dekadën e ardhshme, nga 19 deri në 29 milionë, parashikon dokumenti, shifra këto të frikshme dhe që pritet të kenë pasojat e veta.

---