Zyrtarët e KQZ-së lirohen nga spitali

Të dymbëdhjetë zyrtarët e Komisionit Qendror të Zgjedhjeve që kishin kërkuar ndihmë në Klinikën Infektive të QKUK-së pas hapjes së zarfeve nga Serbia, tashmë janë liruar nga spitali.

Kjo është konfirmuar për KosovaPress nga zëdhënësi i QKUK-së, Shpend Fazliu. Gjendja shëndetësore e 12 zyrtarëve të KQZ-së të shtrirë në Klinikën Infektive ishte vlerësuar e mirë dhe në bazë të rezultateve laboratorike nuk kishin infeksione ngjitëse, përcjell albinfo.ch.

Drejtoresha e Klinikës Infektive, Lindita Ajazaj-Berisha, në një nda daljet e saj para gazetarëve kishte thënë se të gjitha analizat që u janë bërë zyrtarëve kanë treguar se nuk ka infeksione. Ndryshe, të dielën e 13 tetorit gjatë numërimit të votave të ardhura nga Serbia, zyrtarët e KQZ-së janë ankuar për kundërmim, që vinin nga zarfet dhe për një alergji.