Shkoi në Siri, humbi shtetësinë zvicerane

Sipas ligjit, një shtetas i dyfishtë mund të hiqet nga kombësia zvicerane nëse "sjellja e tij ose saj është seriozisht e dëmshme për interesat ose reputacionin e Zvicrës"

Sekretariati Shtetëror për Migracionin (SEM) filloi procedurat kundër një gruaje me kombësi të trefishtë zvicerane, franceze dhe tuniziane.

30-vjeçarja e dyshuar si duket u largua nga Zvicra për në Siri tre vjet më parë me dy fëmijët e saj për t’u anëtarësuar në grupin e Shtetit Islamik, përcjell albinfo.ch.

Raportet thonë se ajo u arrestua nga forcat kurde pranë Baghuz në veri të Sirisë në fillim të këtij viti. Autoritetet zvicerane akuzojnë gruan për pjesëmarrje në krime të kryera jashtë vendit, si pjesë e veprimtarive terroriste, duke minuar interesat e Zvicrës.

Sipas ligjit, një shtetas i dyfishtë mund të hiqet nga kombësia zvicerane nëse “sjellja e tij ose saj është seriozisht e dëmshme për interesat ose reputacionin e Zvicrës”, dhe kjo mund të përfshijë raste kur personi ka kryer një krim të rëndë në lidhje me aktivitetet terroriste ose ekstremizmi i dhunshëm.

E dyshuara ka 30 ditë kohë për të apeluar procedurën, sipas RTS.

Rasti i dytëKy është vetëm rasti i dytë i tillë në Zvicër kohët e fundit. Muajin e kaluar, SEM i tërhoqi shtetësinë zvicerane një shtetast të dyfishtë me origjinë turke. Ai u shpall fajtor për përhapjen e propagandës dhe rekrutimin e xhihadistëve në Zvicër.

 

---