VV: Astrit Dehari është vrarë për shkak se ka qenë aktivist i Vetëvendosjes

Lëvizja Vetëvendosje, pas publikimit të raportit të përpiluar nga Instituti i Mjekësisë Ligjore të Zvicrës për rastin e vdekjes së Astrit Deharit, ka thënë se ky i fundit është vrarë për shkak se ka qenë aktivist i këtij subjekti politik.

VV kërkon që hetimet të fillojnë sa më parë, të pavarura, të drejta dhe profesionale, përcjell albinfo.ch.

“Prokuroria e ka obligim ligjor dhe njerëzor që t’i fillojë hetimet për rastin, në mënyrë që përgjegjësit e këtij krimi monstruoz, që e privoi aktivistin 26-vjeçar Astrit Deharin nga jeta, të vihen të gjithë para drejtësisë. Drejtësia nuk duhet të ndalet para fajtorëve, sado lart që mund të ndodhen ata në hierarkinë e pushtetit”.

“Po ashtu, duhen hetuar edhe ata që përkundër dhimbjes së familjes, shokëve dhe mbarë opinionit publik, u bënë mjet i dezinformimit menjëherë pas vrasjes së Astritit në burg. Cili ishte qëllimi i atyre që me çdo mjet, edhe duke gënjyer e duke i ndërruar fjalët, donin ta mbulonin krimin si vetëvrasje?”

“Lëvizja VETËVENDOSJE po ashtu kërkon që hetimet të fillojnë sa më parë, të pavarura, të drejta dhe profesionale. Qytetarët e Republikës së Kosovës, e gjithë shoqëria dhe shqiptarët kudo që ndodhen nuk janë të qetë deri sa të vihet drejtësia për Astritin”.