Vendos Supremja: KQZ detyrohet të rinumërojë votat e diasporës

Sot në ora 16:19 morëm vendimin nga Gjykata Supreme e Republikës së Kosovës, ku u konfirmua e drejta e bashkatdhetarëve tanë dhe më në fund u hap rruga për numërimin e pakove me vota të ardhura prej tyre”, thuhet në njoftimin e Vetëvendosjes

Gjykata Supreme përmes një aktgjykimi të ri ka shpallur se e ka miratuar ankesën e Lëvizjes Vetëvendosje. Ajo kërkonte që të ndryshohet vendimi i Panelit Zgjedhor për Ankesa dhe Parashtresa, me të cilin ndalohej numërimi i 4639 zarfe me vota të ardhura nga jashtë Kosovës.

Sipas PZAP, këto vota nuk lejohej të numroheshin për shkak se kishin arritur me vonesë në Kosovë.

Megjithatë, ato vota ishin nisur me kohë nga jashtë dhe me vendimin e Supremes, KQZ-ja detyrohet të bëjë këtë numërim.

Kjo ishte ankesa e dytë e VV-së drejtuar Gjykatës së Apelit. Herën e parë ajo i ishte hedhur poshtë.

Lëvizja Vetëvendosje ka përshëndetur vendimin e ri të Gjykatës Supreme.

Ky është reagimi i VV-së:

“Vendimi i Gjykatës Supreme konfirmoi ankesën e Lëvizjes VETËVENDOSJE! Sot në ora 16:19 morëm vendimin nga Gjykata Supreme e Republikës së Kosovës ku u konfirmua e drejta e bashkatdhetarëve tanë dhe më në fund u hap rruga për numërimin e pakove me vota të ardhura prej tyre”, thuhet në njoftimin e Vetëvendosjes.

Kjo parti ka thënë se pret që sa më parë KQZ-ja të mblidhet për të marrë vendim për të vijuar me procedurat e verifikimit dhe numërimit të këtyre fletëvotimeve.

“E gjitha kjo mund të ishte evituar nëse prej 12 tetorit KQZ do të kishte lejuar administratën e KQZ-së që t’i numëronte këto fletëvotime”.

---