Zvicër: Parlamenti shkurton shërbimin e detyruar civil

Në të ardhmen, shërbimi i detyruar civil do të fillojë në moshën 19-vjeçare dhe mund të kryhet më së voni në moshën 36-vjeçare

Parlamenti i Zvicrës, gjegjësisht Dhoma Nacionale dhe ajo e Kantoneve (Senati) kanë vendosur me shumicë votash që të shkurtohet shërbimi civil i personave që i nënshtrohen kësaj forme të detyrimit ushtarak, shkruan srf.ch.

Kështu, sot shërbimi civil fillon nga mosha 20-vjeçare dhe përfundon në moshën 40-vjeçare, transmeton albinfo.ch. Ndërsa në të ardhmen, sipas Parlamentit, shërbimi i detyruar civil do të fillojë në moshën 19-vjeçare dhe mund të kryhet më së voni ne moshën 36-vjeçare. Ky shërbim tani duhet të zgjasë gjithsej 12 vjet.

Shërbyesit e mbrojtjes civile duhet të vihen në shërbim të ndihmës edhe në rastet e katastrofave të mëdha në botën e jashtme. Por ky shërbim duhet të kufizohet vetëm në vendet që janë afër me kufirin e Zvicrës.

Një model  i ndërmjetmë i shërbimit civil, në bazë të të cilit shërbimi i mbrojtjes civile mund të kryhet edhe përnjëherë (jo pjesë-pjesë siç është tash), u hodh poshtë nga të dyja dhomat e Parlamentit të Zvicrës.

---