Zagreb: Në “Ditët e kulturës shqiptare” u mblodhën ndihma për të prekurit nga tërmeti

Për shkak të gjendjes së rëndë në Shqipëri, në shumë takime u mblodhën ndihma për qytetarët shqiptarë të zonave të prekura nga tërmeti

Është bërë e ditur se në Zagreb u zhvilluan aktivitete kulturore. “Ditët e kulturës shqiptare”, e organizuar nga Ministria e Diasporës dhe Investimeve Strategjike dhe Unioni i Shqiptarëve të Kroacisë, nga data 23 -30 nëntor, transmeton albinfo.ch.

Për shkak të gjendjes së rëndë në Shqipëri, në shumë takime u mblodhën ndihma për qytetarët shqiptarë të zonave të prekura nga tërmeti.

Gjatë kësaj kohe u organizua një tribunë shkencore, u mbajt një koncert i muzikës klasike, u hap ekspozita e artistëve Vesa Govori dhe e fotografit Sejfedin Prekazi.

Po ashtu, në kuadër të ‘Ditëve të Kulturës në Zagreb’, në teatrin “Vidra” u dha shfaqja teatrale – komedi “Shumë zhurmë për asgjë”, vepër e William Shakespeare. Kjo shfaqje u luajt nga aktorët e teatrit ‘’Hadi Shehu” nga Gjakova. Ishte kjo një komedi e punuar mjaft mirë nga regjisori dhe aktorët shqiptarë.

Nga ana tjetër, aktivitetet kulturore u përcollën nga një numër i madh i bashkatdhetarëve. Në to morën pjesë edhe z. Gëzim Kasapolli, ambasador i Kosovës në Kroaci, deputetja shqiptare në Parlamentin e Kroacisë, zonja Ermina Lekaj Përlaskaj, përfaqësues të Unionit të Shqiptarëve në Kroaci dhe përfaqësues të Shoqatës Kulturore Shqiptare në Kroaci.

---