Refuzohet ftesa e presidentit Thaçi nga Albin Kurti

Lëvizja Vetëvendosje ka deklarua se takimi mes presidentit Thaçi dhe Albin Kurtit sot nuk do të ndodhë

Është bërë e ditur se lideri i Lëvizjes Vetëvendosje, Albin Kurti, ka refuzuar ftesën e presidentit të Kosovës, Hashim Thaçi, për takim.

Nga Lëvizja Vetëvendosje kanë njoftuar se ftesa e Thaçit ka arritur në selinë e LVV-së sot pak para orës 11:00 dhe se Kurti e ka sot të pamundur që të takojë presidentin e vendit, shkruan Express.

Sipas Vetëvendosjes, Kurti sot ndodhet jashtë Prishtinës. Tutje, shkruhet se ai së shpejti do të njoftojë Thaçin për ditët e orët e mundshme të takimit.

“Pak pas orës 11:00, në selinë e LVV, sot erdhi letra e Presidentit të Kosovës për një takim po ashtu sot në ora 13:30, me Kryetarin e LVV, Albin Kurti. Kryetari Kurti e ka sot të pamundur ta takojë Presidentin, meqenëse ndodhet jashtë Prishtinës. Ai do ta njoftojë së shpejti Presidentin për ditët e orët e mundshme të takimit”, kanë thënë nga VV-ja.

Ndryshe, sot presidenti Thaçi e ka ftuar Kurtin për takim në ora 13:30 në Presidencë.

“Ju ftoj që të merrni pjesë në takim konsultativ për caktimin e mandatit për formimin e qeverisë. Në pajtim me Nenin 84 (14) dhe Nenin 95.1. të Kushtetutës së Kosovës do të ndërmarrë hapat e përcaktuar në Kushtetutë për caktimin e mandatarit për formimin e Qeverisë”, thuhet në ftesën e Thaçit dërguar Kurtit, përcjell albinfo.ch.

---