LDK-ja s’do t’ia japë votat VV-së që ta formojë qeverinë

Vetëvendosje në synimin ta krijojë vetë qeverinë po lë të kuptohet se mban shpresa se do t’i ketë edhe votat e LDK-së, të premtuara pas mbledhjes së Kryesise së kësaj partie, para seancës konstituive të Kuvendit të Kosovës.

Mirëpo, një qëndrim më ndryshe e shfaqi kryetari i LDK-së, Isa Mustafa, në intervistën dhënë RTV21 pas seancës konstituive.

Ai ka lënë të kuptohet se Vetëvendosja veproi njëanshëm dhe pa asnjë njoftim, kur Konjufca u zgjodh kryetar i Kuvendit.

“S’mund të them se është opsion real, sepse nëse veprohet në mënyrë të njëanshme, pa konsultime, pa njoftime, atëherë s’ka kuptim që të jepen votat blanko”, ka thënë Mustafa.

Ai ka thënë se LDK duhet t’u japë përgjigje votuesve të vet, në të kundërtën, përgjegjësia mbetet te Vetëvendosje, transmeton rtv21, përcjell albinfo.ch.

“Në qoftë se ne e marrim bindjen, me të cilën i japim përgjigjen votuesve tanë se kjo është zgjidhje, në rregull, nëse jo, atëherë kjo mbetet çështje e përgjegjësisë së VV-së”, ka thënë Mustafa.

---