Detaje për policin e vrarë në Zhur të Prizrenit

Policia jep detajet për shpërthimin në Zhur, ku mbeti i vrarë një polic dhe u plagosen dy të tjerë dhe një fëmijë

Mbrëmë ka humbur jetën pjesëtari i Policisë së Kosovës, Sami Thaçi, ndërsa dy të tjerë, bashkë me një fëmijë, kanë mbetur të plagosur nga një shpërthim që ka ndodhur në Zhur të Prizrenit, përcjell albinfo.ch.

Ky aksidenti fatal ka ndodhur derisa Njësitë e Policisë së Kosovës ishin duke kryer një aksion bastisje dhe kërkimi antidrogë në një shtëpi në fshatin Zhur të Prizrenit, ku nga një shpërthim dhe plagët e marra ka humbur jetën polici Thaçi, i cili thuhet se është nga Shkarashniku i Malishevës.

Nga ana tjeter, krerët e shtetit dhe kryetarë të partive politike në vend kanë shprehur ngushëllime për humbjen e policit, ndërsa kanë kërkuar nga organet e rendit që kryesit e veprës të dalin para drejtësisë.

Sot, edhe Komuna e Malishevës ka shprehur ngushëllime për humbjen e policit Thaçi.

“Me dhimbje të thellë kemi marrë lajmin për humbjen e jetës së zyrtarit policor, veteranit të luftës dhe atdhetarit Sami Thaçi nga Shkarashniku i Malishevës, i cili mbrëmë dha jetën në krye të detyrës. Ne mbrëmë humbën njërin prej qytetarëve tanë më të devotshëm, humbëm një atdhetar të madh, humbën një njeri, i cili nga mosha 16-vjeçare tërë jetën e vet ia kushtoi atdheut. Në emër të Komunës së Malishevës dhe në emrin tim personal, u shpreh ngushëllime familjes Thaçi, Policisë së Kosovës, OVL të UÇK-së dhe miqve. Ne kemi humbur një njeri të madh. Me këtë rast, kërkojmë nga organet e rendit që ta ndriçojnë rastin në hollësi dhe fajtorët ta paguajnë dënimin më të rëndë”, thuhet në telegramit e ngushëllimit të kryetarit të Malishevës, Ragip Begaj.

 

---