Skenari ideal i zgjidhjes VV-LDK: Konjufca, ministër?

Orët e fundit para seancës së të hënës, ku do përcaktohet fati i themelimit të Qeverisë Kurti, kanë rritur presionin publik ndaj Lëvizjes VETËVENDOSJE dhe Lidhjes Demokratike të Kosovës për arritjen e marrëveshjes.

Për këtë arsye, tashmë janë duke u menduar idetë përfundimtare për sukses.

Klan Kosova mëson se njëri prej skenarëve më potencial është ky:

Pasi LDK-ja e kërkon me çdo kusht postin e Kryeparlamentarit, atëherë mandatari Albin Kurti mund ta propozojë Glauk Konjufcën për ministër!

Konjufca do të obligohej të dorëhiqej nga posti i Kryeparlamentarit, të cilin e mban aktualisht, duke u zhvendosur në ndonjë ministri të rëndësishme, ndërsa një përfaqësues nga LDK-ja do të vinte në këtë pozitë shtetërore.

Kësisoj, edhe do të realizohej kërkesa e LDK-së për këtë post, mirëpo në anën tjetër edhe VV-ja në përgjithësi – e Glauk Konjufca në veçanti – do të shfaqeshin konstruktivë dhe të vullnetshëm për krijimin e koalicionit qeverisës.

Nesër është dita kur do të definohet realizmi i këtij opsioni, shkruan Klankosova, përcjell Albinfo.ch.