Profili i Albin Kurtit

Kuvendi i Kosovës sot votoi Qeverinë e re të Republikës së Kosovës, e cila do të udhëhiqet nga kryeministri, lideri i Lëvizjes Vetëvendosje, Albin Kurti

Kuvendi me vota për, kundër dhe abstenim votoi Qeverinë Kurti që ka 2 zëvendësministra, 15 ministra dhe 33 zëvendësministra.

Ky është profili i Albin Kurtit, kryeministrit të Kosovës, publikuar në ueb faqen e lëvizjes Vetëvendosje (pa ndërhyrje), përcjell albinfo.ch.

Albin Kurti është i lindur më 24 mars 1975 në Prishtinë. Albin iu bashkua Kryesisë së Unionit të Pavarur të Studentëve të Universitetit të Prishtinës në gusht 1997, i cili organizoi protesta paqësore, jo të dhunshme për lirimin e ndërtesave dhe ambienteve të universitetit, të cilat u pushtuan nga autoritetet e regjimit serb.

Kur filloi lufta në Kosovë, në gusht 1998, Kurti filloi të punojë si Sekretar i Zyrës së Përfaqësuesit të Përgjithshëm Politik të Ushtrisë Çlirimtare të Kosovës (UÇK), Adem Demaçi. Kur filluan bombardimet e NATO-s në Serbi dhe Kosovë në mars të vitit 1999, Kurti qëndroi në Prishtinë, dhe, u arrestua nga policia serbe më 27 prill 1999. Kur forcat serbe u tërhoqën nga Kosova më 10 qershor, Kurti dhe mbi dy mijë shqiptarë të tjerë u transferuan në burgjet serbe.

Për shkak të presionit ndërkombëtar, Kurti u lirua më 7 dhjetor 2001. Më 23 prill 2003, Albin Kurti diplomoi në Fakultetin e Elektroteknikës në Universitetin e Prishtinës, drejtimi i Telekomunikacionit me Kompjuterikë.

Në qershor 2005, Albin Kurti me aktivistë të tjerë politikë e bashkëthemeluan një iniciativë qytetare të quajtur Lëvizja VETËVENDOSJE! Ai ishte Kryetar i Lëvizjes VETËVENDOSJE! deri në mars të vitit 2015.

Ai garoi përsëri në zgjedhjet e brendshme për Kryetar të Lëvizjes VETËVENDOSJE! në janar të vitit 2018 dhe fitoi. Albin Kurti ka qenë deputet i Lëvizjes VETËVENDOSJE! në Kuvendin e Republikës së Kosovës për tre mandate me radhë. Në zgjedhjet e fundit parlamentare, Albin Kurti ishte kandidati që fitoi numrin më të madh të votave në vend.

Albin Kurti ka botuar me qindra artikuj, dhe është ftuar të prezantojë në universitete të ndryshme të njohura brenda dhe jashtë vendit.

Ai gjithashtu ka shërbyer si Kryetar i Komisionit për Punë të Jashtme në Kuvendin e Republikës së Kosovës në vitet 2011-2014. Ai flet rrjedhshëm gjuhën shqipe, angleze dhe serbo-kroate.

Albini është i martuar dhe ka një fëmijë.

---