Kryeministri Kurti ka pritur delegacionin e Fondit Monetar Ndërkombëtar

"Delegacioni u interesua rreth ligjit për pagat. Kryeministri tha se programi qeverisës ka në thelb të tij eliminimin e pabarazisë në paga"

Kryeministri i Kosovës, Albin Kurti ka pritur sot në takim delegacionin e FMN-së. Në krye të delegacionit ishte Gabriel Di Bella, Shef i Misionit për Kosovë, Departamenti Evropian (EUR), Stephanie Eble, Oana Elena Luca, Zhongxia Zhang, Shushanik Hakobyan, Selim Thaçi dhe Mentor Mehmedi.

Ky delegacion e përgëzoi kryeministrin lidhur me faktin se buxheti ka vendosur në përparësitë e tij fushat e shëndetësisë, arsimit, pra e ka vënë theksin mbi fushat e interesit shoqëror, thuhet në njoftimin nga Zyra e Kryeministrisë.

“Delegacioni u interesua rreth ligjit për pagat. Kryeministri tha se programi qeverisës ka në thelb të tij eliminimin e pabarazisë në paga, kjo parë në rrafshin më të gjerë, atë të rishpërndarjes së pasurisë në shoqërinë tonë në mënyrë më të drejtë. Përveç kësaj duhet pritur edhe vendimi i Gjykatës Kushtetuese”, thuhet në njoftim.

---