Detaje të reja për vdekjen e zviceranit në Prishtinë

Sipas mediave atje, ai ishte përdoures i substancave narkotike

Një vdekje e dyshimtë ka ndodhur pasditen e së hënës në një hotel të Prishtinës. Një 61-vjeçar, shtetas zviceran, u gjet pa shenja jete dhe Departamenti për Krime të Rënda të Prokurorisë Themelore ka nisur hetimet.

Trupi i pajetë i tij kishte qëndruar në hotel rreth katër orë.

Mediat në Kosovë raportojnë viktima D.R. ishte përdorues i alkoolit dhe substancave narkotike dhe se në trupin e pajetë të viktimës nuk janë vërejtur shenja të dhunës apo të përdorimit të ndonjë arme zjarri.

Ndërkohë, Prokuroria ka nisur hetimet për rastin e vdekjes, e cila deri në momentin e zbardhjes po cilësohet si e dyshimtë.

Zëdhënësja e Prokurorisë Themelore në Prishtinë, Laureta Ulaj, ka thënë për media se prokurori kujdestar ka urdhëruar që trupi i pajetë i viktimës të dërgohet në Institutin e Mjekësisë Ligjore për obduksion.

“Prokurori kujdestar e ka cilësuar si vdekje të dyshimtë, me urdhër të tij trupi i tij do të dërgohet në IML, sot gjatë ditës do ta lëshojë urdhëresën për obduksion. Autopsia do të tregojë shkaqet e vdekjes”, ka thënë Ulaj.

Për gjetjen e një trupi të pajetë në një hotel në Prishtinë ka njoftuar edhe Policia e Kosovës në raportin 24 orësh.

“Rr. “Ilaz Agushi”, Prishtinë, 02.03.2020 – 17:04. Është raportuar se viktima mashkull, shtetas zviceran, është gjetur i vdekur në një hotel. Në vendin e ngjarjes kanë dalë njësitë policore si dhe ekipi mjekësor, të cilët kanë konstatuar vdekjen. Me urdhër të prokurorit, trupi i pajetë është dërguar në IML për obduksion”, ka bërë të ditur policia, përcjell albinfo.ch.

---