Zvicra mbyll 9 vendkalime kufitare me Italinë

Punonjësit e Administratës Doganore pritet t`u rekomandojnë udhëtarëve që të mos udhëtojnë nga Italia në Zvicër

Sot, autoritetet  përgjegjëse federale kanë mbajtur në Bernë një konferencë për gazetarë në lidhje me koronavirusin, e cila është transmetuar nga shumë media zvicerane.

Me këtë rast janë kumtuar edhe disa vendime që janë marrë në përputhje me shtimin e rrezikshmërisë që po vjen në Zvicër nga virusi i përmendur, shkruan albinfo.ch.

Ndër masat preventive që janë marrë është mbyllja e nëntë vendlkalimeve kufitare me Italinë, në Kantonin e Tiçinos, në jug të vendit. Me këtë veprim, Qeveria Federale synon që  qarkullimin ndërkufitar me Italinë ta kanalizojë urgjentisht vetëm në vendkalimet e mëdha, kryesore.

Por, kufiri me Italinë vazhdon të mbetet i hapur për kalim, përcjell albinfo.ch. Ndërkaq, në kuadrin e kontrollimeve që bëhen në kufi, punonjësit e Administratës Doganore pritet t`u rekomandojnë udhëtarëve që të mos udhëtojnë nga Italia në Zvicër.

Vendkalimet kufitare që janë mbyllur me vendim të Qeverisë janë: Pedrinate, Ponte Faloppia, Novazzano Marcetto, San Pietro di Stabio, Ligornetto Cantinetta, Arzo, Ponte Cremenaga, Cassinone, Indemini.

---