Skip to content

Shtrenjtimi i banimit dhe energjisë rëndoi buxhetet familjare në Zvicër gjatë vitit 2024

(KEYSTONE/Gaetan Bally)

Shpenzimet për banim dhe energji arritën në 14.8 për qind të të ardhurave bruto, ndërsa shpenzimet e detyrueshme, përfshirë tatimet, kontributet sociale dhe sigurimin shëndetësor, përbënin rreth një të tretën e të ardhurave të familjeve.

Shpenzimet për banim dhe energji në Zvicër shënuan rritje të ndjeshme gjatë vitit 2024, duke arritur mesatarisht në 1.546 franga zvicerane në muaj për familje, krahasuar me 1.449 franga në vitin 2023.

Sipas Anketës për Buxhetin Familjar, të publikuar nga Zyra Federale e Statistikave (BFS), shpenzimet për banim përbënin kategorinë më të madhe të shpenzimeve të konsumit të familjeve zvicerane. Në total, këto shpenzime arritën në 5.244 franga në muaj, apo 50.2 për qind të të ardhurave bruto.

Ndërkohë, shpenzimet e detyrueshme për tatime, kontribute të sigurimeve sociale dhe sigurim shëndetësor kapën mesatarisht 3.240 franga në muaj, që përfaqësonin rreth 31 për qind të të ardhurave bruto.

Pjesën më të madhe të këtyre shpenzimeve e zinin tatimet, me një mesatare prej 1.274 frangash në muaj, ose 12.2 për qind të të ardhurave. Pas tyre renditeshin kontributet e sigurimeve sociale, me 10.2 për qind, dhe primet e sigurimit shëndetësor, me 7.2 për qind.

Sipas të dhënave statistikore, një familjeje mesatare në Zvicër i mbeteshin 1.578 franga në muaj për kursime, apo 15.1 për qind e të ardhurave. Megjithatë, kjo gjendje ndryshonte dukshëm në varësi të nivelit të të ardhurave.

Familjet në kategorinë me të ardhurat më të ulëta, përkatësisht ato me të ardhura bruto mujore nën 4.933 franga, në shumë raste shpenzonin më shumë sesa fitonin.

Të ardhurat e disponueshme mbetën pothuajse të pandryshuara

Pavarësisht rritjes së kostove të jetesës, të ardhurat e disponueshme të familjeve private në Zvicër ndryshuan shumë pak ndërmjet viteve 2023 dhe 2024.

Mesatarja mujore u rrit nga 7.186 franga në 7.209 franga. Të ardhurat e disponueshme llogariten pasi nga të ardhurat bruto zbriten shpenzimet e detyrueshme.

Megjithatë, shpërndarja e tyre mbetet e pabarabartë: 61 për qind e familjeve në Zvicër kanë të ardhura të disponueshme nën mesataren kombëtare.