Kosova vazhdon të jetë imune ndaj koronavirusit

Arben Vitia: S’ka asnjë rast të konfirmuar me koronavirus, masat kanë për qëllim mbrojtjen e shëndetit publik

Ministri i Shëndetësisë, Arben Vitia, ka njoftuar se deri më tani Kosova ende nuk është prekur nga koronavirusi.

“Lajmi i mirë është që deri më tani nuk kemi asnjë rast të konfirmuar me Covid-19”.

Ai tha se ndërmerrja e masave që nga dita e djeshme kanë për qëllim parandalimin e përhapjes së koronavirusit dhe mbrojtjen e shëndetit publik.

Ai gjithashtu njoftoi se tashmë iu kane dërguar Qarkoren Informative të gjitha institucioneve shëndetësore, publike dhe private, që ka për qëllim mbrojtjen e stafit dhe sigurimin e pacientëve.

Vitia tha se ndër masat e parapara me këtë qarkore janë ndalimi i shoqëruesve të panevojshëm për pacientë; të gjitha institucionet shëndetësore të kenë dhoma të veçanta të përgatitura për raste të dyshimta; të realizohen kontrolle dhe inspektime maksimale; të shtohet kontrolli i brendshëm profesional; të rritet në maksimum përkujdesja e stafit shëndetësor për higjienë personale dhe publike; të aplikohen masat mbrojtëse; të vendosen materialet informuese për koronavirusin si dhe të raportohet nga të gjitha institucionet shëndetësore çdo rast i dyshimtë për koronavirus.

Ndër të tjera Vitia këshilloi të gjithë qytetarët që të jenë të kujdesshëm me higjienën e tyre – pastrimi i duarve – të aplikohet distancë nëpër vendet publike, personat e moshuar dhe me sëmundje kronike t’i reduktojnë lëvizjet jashtë si dhe rekomandohet lirimi nga puna i njërit prind, apo edhe i atyre personave që mund t’i realizojnë detyrat nga shtëpia, përcjell albinfo.ch.

Ministri i Shëndetësisë bëri apel tek të gjithë qytetarët që këto masa të kuptohen vetëm si kujdes i shtuar për shëndetin publik dhe theksoi se Kosova bën pjesë në mesin e vendeve me rrezikshmëri të ulët për koronavirus.

---