Kosovë: Edhe katër raste të reja me koronavirus

Numri i të prekurve shkon në 28.

Edhe katër raste të reja janë konfirmuar se janë prekur me koronavirus. Rastet e fundit janë nga Ferizaj, Prishtina dhe Gjakovë.

Sot, më 21.03.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar 30 mostra të dyshimta për virusin SARS-CoV-2 dhe katër prej tyre janë pozitive.

Nga katër rastet e konfirmuara, njëri është rast i importuar nga Gjermania, i gjinisë mashkull, 32 vjeç, me vendbanim në Bibaj-Ferizaj. Ndërsa tri rastet e tjera pozitive janë raste kontakti, 2 prej tyre janë me vendbanim në Prishtinë, femra të moshës 50 dhe 29-vjeçare dhe e treta me vendbanim në Gjakovë, e gjinisë femër, 40-vjeçare. Të gjitha kontaktet janë të identifikuara.

Nga data 08.02.2020 deri më 21.03.2020 në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 447 mostra të dyshimta në virusin SARS-CoV-2 dhe prej tyre, gjithsej njëzet e tetë raste kanë rezultuar pozitive.

---