Ky është qëndrimi i grupeve parlamentare në lidhje me mocionin e mosbesimit

Deklarata e kryetarëve në lidhje me mocionin

Me 106 deputetë në sallë, ka filluar seanca në Kuvendin e Kosovës. Në rend dite është vetëm votimi i mocionit të mosbesimit ndaj Qeverisë Kurti.

Grupet parlamentare NISMA-AKR dhe 6+ u deklaruan pro mocionit ndaj Qeverisë Kurti.

Lista Serbe gjithashtu do të mbështesë rrëzimin e Qeverisë. Igor Simiq nga Lista Srpska, ka deklaruar në fjalën e tij në Kuvend, se të 10 deputetët serbë nga kjo parti do të votojnë pro mocionit të mosbesimit ndaj Qeverisë Kurti.

“Lista Serbe nuk e ka mbështetur këtë Qeveri që nga fillimi. Kur bëhet fjalë për punën e saj, ne kemi pasur në vazhdimësi vërejtje, sidomos për taksën që po dëmton të gjithë. Gjëja e dytë që kjo Qeveri nuk e ka bërë, është tregimi i respektit minimal për komunitetin serb. Të gjithë 10 deputetët e Listës Serbe do të mbështesin rrëzimin e kësaj qeverie”, tha Simiq.

Deputeti i AAK-së Daut Haradinaj, tha se është ditur moti që Albin Kurtit do t’i merret mandati.

“Kemi vetërrëzim të planifikuar të kësaj qeverie”, tha Haradinaj në fjalën e vet.

Sipas tij në Qeverinë Kurti, ka pasur “Diskriminimi buxhetor i zonave të caktuara”.

“I kemi raportet më të këqija me aleatët tanë. Kjo qeveri në kohën më të keqe po shkon”, tha ai, duke shtuar se “nuk e dimë për çfarë lajmi të mirë do të mbahet mend”.

Kurse, Kryetari i Grupit Parlamentar të PDK-së, Memli Krasniqi, ka thënë se partia e tij do të votojë pro mocionit të mosbesimit ndaj Qeverisë Kurti.

“Që në zanafillën e vetë, koalicioni qeverisës ndërmjet LVV-së dhe LDK-së e ka dëshmuar papërgjegjësinë ndaj vendit dhe paaftësinë për të qeverisur në mënyrë normale, fillimisht me vonesën e tejzgjatur prej 119 ditëve për ta formuar qeverinë, duke e mbajtur të paralizuar jetën institucionale të shtetit dhe duke e penguar rrjedhën normale të zhvillimit në vend. Kjo zvarritje ishte edhe dëshmia e parë e mashtrimit të drejtpërdrejtë që këto dy parti i bënë elektoratit të tyre pasi i kishin premtuar qeveri brenda 72 orësh mbi baza parimore, ndërsa u katandisën në katër muaj vonesë dhe në një pazar joparimor për poste dhe pushtet. Ky kryeministër e kjo qeveri nuk meritojnë të qeverisë Republikën e Kosovës”, tha ai.

“Partia Demokratike e Kosovës do të votojë pro mocionit të mosbesimit, jo vetëm sepse është në krye të opozitës dhe përshkrimi i natyrshëm i punës së çdo opozite të një vendi demokratik është që t’ia shkurtoj sa më shumë jetën qeverisë, por edhe sepse me të vërtetë kjo ka qenë qeveria më e paaftë e historisë së demokracisë së Kosovës dhe meriton të ikë sa më shpejtë”.

Ndërsa, Rexhep Selimi nga Lëvizja Vetëvendosje, duke iu drejtuar LDK-së, PDK-së, AAK-së e Nismës, u ka thënë se kurrë Vetëvendosjen s’mund ta mposhtin.

“Ju mund edhe ta shtyni përpara një marrëveshje Thaçi-Vuçiq. Por kurrë s’mund të na mposhtini neve”, tha Selimi, tranmseton Koha.

Selimi tha se në kohën kur e gjithë bota po lufton ndaj pandemisë COVID-19, këto parti po luftojnë për pushtet.

Kryetari i Grupit Parlamentar i Lidhjes Demokratike të Kosovës (LDK), Arben Gashi, ka arsyetuar shtrimin e mocionit të mosbesimit ndaj Qeverisë Kurti, ku bën pjesë edhe partia e tij.

Pasi numëroi, sipas tij, dështimet e Qeverisë Kurti, Gashi ftoi deputetët të votojnë pro mocionit të mosbesimit.

“Në situatën që ndodhemi, ftoj deputetët që përmes votës së mosbesimit të rrëzojnë këtë Qeveri. Na duhet një Qeveri e re për kohë të pacaktuar që do të adresonte sfidat imediate”, ka thënë Gashi.

 

 

 

---